जब उनी तीन वर्षकी थिइन् तब उनको कुद्ने, खेल्ने उमेर थियो तर उनको सबै खुसी चार पर्खालको बिचमा कैद गरिएको थियो । जुन उमेरमा उनको हातमा खेलौना हुनुपर्ने थियो, त्यहि उमेरमा उनको हातमा कुचो र जुठा भाँडा थमाइयो । हो, यस्तो घटना भएको छ भारतको मध्य प्रदेशमा पर्ने इन्दौरमा । एक बालिकालाई करिब १०
वर्षसम्म बन्धक बनाएर बाल मजदुरको रुपमा राखिएको तथ्य सार्वनिक भएको छ । गत सेप्टेम्बर २९ तारिखका दिन ती १३ वर्षीया बालिका मौका मिल्ने बित्तिकै घरबाट भाग्न सफल भइन् । कसैले उनलाई देखेर चाइल्डलाइन नामको संस्थासम्म पुर्याए । उक्त बालिकाले संस्थाका प्रतिनिधिहरुलाई दिएको बयान अनुसार उनी विगत १० वर्षदेखि चन्दा राय र रेणु रायको घरमा बाल मजदुरको रुपमा काम गर्दै आएकी थिइन् । उनका अनुसार घरको सबै काम गर्दा गर्दै पनि ती महिलाहरुले उनलाई कुटपिट गर्ने गरेको बताएकी छिन् । ती बालिकालाई घरेलु कामदारको रुपमा राखिएता पनि न त उनले पढ्ने मौका पाइन् न त उनलाई काम गरेबापत केहि रकम नै उपलब्ध गराइयो । संस्थामार्फत यो घटना बाल कल्याण समितिसम्म पुग्यो । समितिले पिडित बालिकाको बयान पनि दर्ता गरिसकेको छ । अब बाल कल्याण समितिले उक्त बालिकाको भरण–पोषणका लागि बाल आश्रम पठाउन आदेश दिएको छ । (एजेन्सी) www.ratopati.com
तपार्इंको प्रतिक्रिया तलको बक्समा लेख्नुस
